La Grupa Bal Populer Sëlva y S. Cristina ie metuda adum da jëuni, dantaldut de Sëlva y S. Cristina, che bala gën y che stà gën te na blòta cumpania. L fin dla lia ie de scuné la troht dala Gherdëina y de mantenì i bai tradiziunei y la mujiga populera, acioche i vënie dac inant ala generazions che vën. La grupa bala bai scric su uriginariamënter tl Südtirol ma nce bai da autri raion dla Elpes.
La grupa tol pert a defiledes y bala dan al publich ntan festes y sëires tirolejes te Gherdëina ma nce oradecà. La Grupa Bal Populer de Sëlva ie unida metuda su de autonn dl 1983 de Bruno Riffeser dla Vila deberiëda ala “Lia per Cultura y Usanzes Sëlva”. Bele do sies mënsc de proes pudova la grupa se ejibì n ucajion de na premiazion de na gara de schi.
Do chësta esperiëza, pudova la grupa for inò balé dan al publich te de uni sort de ucajions. Tl ann 2002 po', iel stat na fasa de mudamënt. Do che de plu cumëmbri ova lascià, iesen stai boni de mutivé truep de nuef jëuni per l bal populer. Chisc à purtà ite vënt frësch tla grupa. De dezëmber dl medemo ann se à la grupa destacà dala “Lia per Cultura y Usanzes Sëlva” y ie deventeda na lia ndependënta cun l inuem “Grupa Bal Populer Sëlva y S. Cristina”.
Tl agost dl 2023 à nosta lia pudù festejé l aniverser di 40 ani de atività cun na bela festa samont. N chësta ucajion se à pitli, jëuni y manco jëuni ancuntà per balé cun la mujiga dla „Burgstaller Tanzlmusig” y dla grupa „OdleSound”. Cumëmbri, excumëmbri, cumënbri d'unëur, cumpanies y parënc se à ancutà per n blòt domesdì y sëira samont. N ucajion de chësta festa iel unì balà l „Bandltanz” adum cun la grupa da bal de Ciastel. L Cor di Mutons de Sëlva à purta dant n valgun bai y cianties.
